Skip to content

Paket Langkok Tuan Kadi

27 Desember 2009

Paket Lengkap Pak Penghulu – Pulang dari baralek, Mangkutak langsuang singgah di rumah gadangnyo manamui aciaknyo nan banamo Sabai nan Aluih tu.
Gadih rancak, mantan raner up Uni Uda se alam Minangkabau ko nan alun juo balaki sampai kini. (Memang baitu dalam kaba Sabai nan Aluih, sampai kaba sudah, indak surang juo tukang kaba mancaritokan bahaso Sabai tu lai balaki atau indak).

Sasudah nyo bukak saluak, nyo tanggakan baju itam baludu nan basaku-saku tu nan lah basah dek paluah, kain sasampiang taba nan bakilek-kilek, Mangkutak basanda di tonggak tuo. Nyo kipeh badannyo samo surang, samantaro Sabai pai maambiak aie putiah sa mok.

“Baa acara baralek? Lai rami? Baa mangko babukak bana baju kabasaran waang ko? Angek bana hari kini?” tanyo Sabai sambia malatak an aie dingin di dakek Mangkutak tasanda tu.

“Memang luar biasa ciak! Kini sagalonyo lah dijadikan paket-paket pesanan. Tenda, galeh, piriang, bisa dipasan dalam ciek paket. Palaminan, suntiang anak daro, hiasan kamar, bisa dipasan dalam ciek paket pulo. Randang, gulai tunjang, pergedel, kalio jariang, bisa dipasan dalam ciek paket pulo. Kini awak indak paralu bana repot-repot lai. Angkek talepon, buek pesanan, tantuan hari baralek, beres! Sagalonyo kini bisa dipasan perpaket!” jawek Mangkutak.

“Lah katinggalan waang mah Mang. Pesanan-pesanan nan saroman tu lah lamo dibuek urang. Kini bahkan tampek baralek bisa dipasan jo kamar penganten nyo sakali! Baralek di hotel, anak daro jo marapulai diagiah kamar gratis duo malam,” jawek Sabai indak namuah kalah.

“Tapi kutiko urang mambuek musajik kini, bisa eceran ciak. Indak paralu dipasan per paket doh.
Lah tabaliak edong dunia ko,” kato Mangkutak.
“Apo mukasuik waang tu Mang?” tanyo Sabai.
“Kalau kini urang mambuek musajik, tonggak, kubah, mihrab, bisa dibali ketengan. Dibali ciek-ciek. Indak paralu bana tukang banyak-banyak digaji doh,” kato Mangkutak.
“Lah lamo dibuek urang saroman tu mah Mang. Itulah waang, ka musajik katiko mahadiri urang nikah sajo, indak tahu lai apo nan tajadi tiok hari di musajik,” kato Sabai mangaritik Mangkutak.
“Tapi kini ado pulo nan paliang hebat lai ciak,” kato Mangkutak sasudah maabih an aie dingin sa mok tu.
“Apo tu?” tanyo Sabai.

“Acara nikah kapatang ko bana-bana sangat menyentuh perasaan. Kutiko lah sudah sudah surek-surek nikah ditando tangani, tibolah saatnyo Kadi mambaco kutubah nikah. Sabalun tu, angku Kadi manyuruah anak daro jo marapulai sujuik ka bapak mande surang-surang mintak maaf. Kutiko nak daro marapulai tu sujuik tadangan bunyi bansi. Sudah tu permohonan dari anak ka urang tuonyo, mintak direlakan air susu nan alah dibarikan ka mereka tu kutiko masih bayi daulu. Tadanga suaro urang padusi bapantun-pantun sedih bacampua jo tangih. Tagak bulu ramang waden mandanganyo ciak,” kato Mangkutak.

“Sia nan maambuih bansi? Sia padusi nan bapantun-pantun mintak maaf tu?” tanyo Sabai heran.
“Itulah ciak. Mulo-mulo waden heran juo. Sasudah den sigi suok kida, tanyato suaro bansi jo suaro pantuin-pantun mintak maaf tu datang dari hape tuan Kadi. Ruponyo, lah disiapkan dek Tuan Kadi sajak dari rumahnyo. Pas kutiko acara tu, Tuan Kadi langsuang maiduik an hapenyo, dan acara nan mengharukan itu pun mulai. Ondeh ciak. Anak daro jo marapulai tu maluluang-luluang. Kami nan hadirpun tagak bulu ramang dek inyo,” kato Mangkutak.

“Iyo hebat tumah,” jawek Sabai saroman urang lai picayo lai indak.
“Tu baa lai?” tanyo Sabai.
“Sasudah acara salasai, ado pulo urang batanyo ka Tuan Kadi tu.
Mananyokan bara baienyo mambek paket acara nikah saroman tu,” jawek Mangkutak.
“Bara baienyo Mang,” tanyo Sabai.

“Ruponyo Tuan Kadi tu alah mambuek paket khusus, paket pernikahan namonyo. Jadi kalau urang nio mamasan, tasarah apo nan diparalu an urang tu. Kadi untuk proses pernikahan, sekian. Suaro bansi jo pantun-pantun sedih mintak maaf, sekian. Kalau ditambah pulo jo pakaian Arab untuk nikah, sekian. Pakai penyanyi kasidah, sekian pulo. Persis saroman urang mambuek paket baralek pulo. Tuan Kadi tu manawarkan pulo acara baralek Islami. Makanan halal, sekian. Pagar betis Islami sekian urang, sekian pulo pitihnyo. Langkok ciak! Langkok!” sorak Mangkutak.

Sabai manggeleng-geleng surang.
“Baa kok manggeleng-geleang surang aciak? Indak satuju aciak jo caro Tuan Kadi tu mambuek paket pernikahan?” tanyo Mangkutak.
“Kok iyo langkok paket pernikahan Tuan Kadi tu, dalam paketnyo tu lai tasabuik manyadiokan laki bagai?” tanyo Sabai.

“Manyadiokan laki?” kato Mangkutak.
“Kok indak, alun langkok paket Tuan Kadi tu lai!” kato Sabai sambia mancibie tagak maambiak mok aie dingin nan alah kosoang diminun dek Mangkutak

Sumber : WisranHadi

One Comment leave one →
  1. fuji permalink
    8 Januari 2010 22:56

    serumit itukah???

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: